Plantun de Prouvènço

Pèr coumpara dos planto d'encò nostre

Jacobaea erratica & Cyperus esculentus

Erbo-de-sant-Jaume(-bastardo)

Jacobaea erratica

Asteraceae Compositae

Autre noum : Seniçoun(-barrulaire).

Noms en français : Séneçon erratique, Séneçon à feuilles de barbarée.

Descripcioun :
Planto pulèu grando que flouris un pau tard dins l'estiéu e en autouno. Se destrìo dis àutri Jacobaea e Senecio subretout emé si fueio que lou darrié fueioun èi bèn mai grand que lis autre (fotò). Peréu sa souco reballo pas au sòu coume lou seniçoun-di-fueio-de-rouqueto.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 40 à 200 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Jacobaea
Famiho : Asteraceae
Famiho classico : Compositae
Tribu : Senecioneae

Coulour de la flour : Jauno
Petalo : >6
Ø (o loungour) enflourejado : 15 à 20 mm
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Prado umido - Ribiero
Estànci : Termoumediterran à Mountagnard
Couroulougi : Éurimediterranenco
Ref. sc. : Jacobaea erratica (Bertol.) Fourr., 1868 (= Senecio erraticus Bertol., 1810 )

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.